ఐప్యాడ్‌లో మరో రెండు మోడళ్లు

ఎలక్ట్రానిక్ దిగ్గజం ఆపిల్ కంప్యూటర్స్ తాజాగా ఐప్యాడ్‌లో మరో రెండు మోడళ్లను ఆవిష్కరించింది. ఐప్యాడ్ ఎయిర్ 2, మినీ 3లను అందుబాటులోకి తెచ్చింది. గత మోడల్ కంటే ఎయిర్ 2 18 శాతం సన్నగా ఉంటుం ది. కేవలం 0.24 అంగుళాల మందంతో ఉండే ఈ ఐప్యాడ్.. ప్రపంచంలోనే అత్యంత పలుచని ట్యాబ్లెట్ పీసీ అని ఆపిల్ వైస్‌ప్రెసిడెంట్ ఫిల్ షిల్లర్ తెలిపారు. 435 గ్రాముల బరువుండే ఈ ఐప్యాడ్ ఏ8ఎక్స్ ప్రాసెసర్‌తో పనిచేస్తుంది.

దీని బ్యాటరీ 10 గంటల వరకు పనిచేస్తుందని కంపెనీ తెలిపింది. ప్యాడ్‌కు రెండు వైపులా ఉండే కెమెరాలతో హెచ్‌డీ క్వాలిటీ వీడియోలు తీసేందుకు వీలుంటుంది. అంతేకాదు ఇప్పటివరకు ఐఫోన్‌లలో మాత్రమే అందుబాటులో ఉన్న ఫింగర్‌ప్రింట్ ఆన్‌లాకింగ్ సిస్టమ్‌ను ఇందులోనూ ప్రవేశపెట్టారు. తాజాగా ఆవిష్కరించిన మినీ 3లోనూ ఈ ఫీచర్‌ను అందుబాటులోకి తెచ్చారు. భారత్‌లో ఐప్యాడ్ మినీ 3 ధర రూ.28,900గా ఉండనుండగా.. ఎయిర్ 2 మోడల్ రూ.35,900కు లభించవచ్చు.